Cerita Rakyat Soppeng

ASSALENNA NACAKKELLEQ RIALA

 LAMBANG RI SOPPENG

 Engka naengka siwettu ri Soppeng natemmadeceng pakkalinoangnge nasabaq pada maeloq’I makkaq’I alena mancaji aqjuareng. Nennia pole toni timo temmaka-makae pitu taung ettana. Deqna gaga wedding pole uwesesae. Akurangenni anre tau Soppeng’e. iyae kajajiangi nasabaq pangkaukenna paqbanua’e iya deq’e napojiwi dewata seuwae.

Engka naengka seuwa esso nasipulungna matoa ennengnge pulona mappasiduppa ada. Bicara’I pekkogi makessing pakkalinoangnge paimeng nawedding to pole uwesesae.

Mattengangiro maqbicara matoa ennenge pulona magi nateppa engka cakkelleq silabine maccekkeng ri yaseqna tau maqbicarae patiwi ase siule. Tessiagai ittana naluttuna cakkeleq ero, namakessing oninna sabaqna naolli maccue rialena momponi rilaleng pikiriqna matoa ennenge pulona makkedae” cakkeleq ero najellokengi laleng lao sapaq’I  tau maeloq’e  riakka mancaji aqjuareng. Nassuroanni matoa ennenge pulona lao maccueriwi cakkelleq ero.

Pappai bajae lao tongenni tauwe maccueriwi cakkelleq ero. Tegi-tegi naengkalinga moni, kusiri lao passappae. Tessiagai ettana joppa narapini tangasso napoleitoni lupu. Aga naleppangna mappesau nainappa natimpaq bokonna maeloq manre esso. Ianaro sabaqna nariaseng onrongero Labokong.

Tessiaga ittana joppa naruntuqni seddie dareq temmaka loanna penno ase maridi maneng pada-pada sae natiwi’e cakkelleq nalellungngero. Naruntuqni seqdie tau paqdongina asewero, namakkutanana makkeda,” tegi monro punnana asewe?” Namappebalina maqkeda, “ Deqto namabela pole rionrongewe”. Aga nalaona rionronna tau punnae ase. Narapini ri bola naonroiye punnana ase nabissaini ajena, natuppu aqdeneng, nalettoi apakappang datudang ritappere maruqdanie nasujuq mappakaraja. Naruntuqni seqdie tau manurung mappakeang tudang ri laleng mpola riteqdungi rijoana.

Purai pada passimangni nalisu lao ri Soppeng. Tessiaga ittana mallaleng aga naleppanna mappesau nainappa giling mitai bola napoleie nadeqna napaita. Iyanaro sabaqna nariaseng onrongero Sekkanyiliq.

Riwettu lettunana ri Soppeng, matteruni ri matoa ennenge pulona mappitangi ase natiwie nennia nacaritangi tau naitae rilaonna. Nasseqdingini matoa Bila, matoa Botto sibawa matoa Ujung makkedae tau engkau ri Sekkanyiliq tomanurung, iya makkessinge riakka mancaji aqjuareng. Aga napada samaturuni matoa ennenge pulona maeloq lao ri onronna tomanurungero. Aga pada naakkarenni ale pada lao ri onrongero.

Lettuqnana ri bolana tomanurunge, nabissai ajena, nainappa natuppu aqdeneng, nalettoi appakappang na lao tudang ri tappere maruddanie, sujuq mappakaraja lao ri tomanurunge nainappa makkeda,” iyanamai kiengkang lamarupeq maeloqki muamaseang naajaqna muallajang naikona ripopuang, mudongiri temmatipa, musalipuri temmadingi, muwessai temmakapa, ikona mpawakeng rimae rimabela, namauna anaqmeng napattaromeng muteyai kiteyatoi.”

Makkedaini Tomanurunge ri Sekkanyiliq,”Temmaqbelle areqga, tedduwa nawa-nawaga”. Sitarimanni matua ennenge pulona sibawa manurunge ri Sekkanyiliq. Iyyana Tomanurunge ri Sekkanyiliq  riakka mancaji datu mammulang ri Soppeng riyaseng Latemmamala.

Makkedatopi tomanurunge ri Sekkanyiliq, “ Engka topa upoadakko mennang engkatopa sapposisengku manurung ri Libureng. Madeceng ko mulao malai muakkarengi ale iko tau Soppeng’e kidua sapparengko deceng  mennang. Naiyaro mupadatu ri Soppeng Rilau, naiyaqna mupadatu ri Soppeng Riaja, mupasituru tangnga mulao malai.” Purairo laoni matua ennenge pulona ri Libureng kua riasenge Manurunge ri Goarie. Napolaini Manurunge tudang ri Balubu naqdepparie.

Makkedai matoa Bila, matoa Ujung, sibawa matoa Botto,” iya kiengkang lamarupeq maeloqki muamaseang naajaqna muallajang naikona kipopuang, mudongiri temmatipa, musalipuri temmadingi, muwessai temmakapa, naikona mpawekkeng ri mae ri mabela, namau anaqmeng  napattaromeng muteyai kiteyatoi.”

Makkedaini tomanurunge ri Goarie “ Temmabelle areqga, tuddua nawa-nawaga.” Aga nasitarimanna adae . iyanaro riaseng akkulu adangenna napuata lettuq ritorimonrinna tau Soppeng’e.

Iyanaro assabarenna na cakkelle riala lambing ri Soppeng nasabaq iya pitakki laleng asalamakeng riwettu temmadecenna pakkalinoange nennia riwettu tempeqdinna pole uwesesae.